ARRI ALEXA 35 part1

         ARRI  ALEXA 35

  ان تأتي متأخرا خير من ان لا تأتي ابدا

(ALEXA35 الجزء الاول)

         ان تأتي متأخرا خير من ان لا تأتي ابدا دي الجملة اللي ممكن ابدأ بيها كلامي عن كاميرا ALEXA 35 اللي قدمتها شركة ARRI اخر يوم في شهر مايو 2022 ، الحقيقة ALEXA 35 هي مشروع موجود داخل الشركة  من 2018 لتطوير ALEXA Mini بكاميرا بدقة تفاصيل قياسية  Native 4K بفورمات S35، لكن مش تاخير انتاج الكاميرا بس لكن ARRI في المره دي اتاخرت في استخدام تكنولوجيا موجودة من فترة كبيرة وياما ARRIنفسها كانت معارضاها، على العموم اي مستخدم يهمه النتيجة بغض النظر عن التكنولوجيا المستخدمة وده اللي هيختبروه مديري التصوير والمخرجين الفترة اللي جاية.

    الكاميرا فيها كلام كتير ها نقوله واحدة واحدة في مقالين الأول بيشرح الكاميرا والسينسور الجديد ALEV4 وعلم الالوان الجديد REVEAL موضوع ملفات الصورة ALF-4 والجديد في موضوع Texture والمقال التاني ها يوضح ايه القصة وايه الجديد وايه القديم وهل ARRI فعلا قدمت جديد؟؟!!  

كاميرا ALEXA 35 أحدث إصدارات شركة ARRI استكمالا لسلسة كاميرات السينما الرقمية ARRI ALEXA

35ALEXA بتشتغل بشريحة حساسة مقاس Super35 لكن بسينسور جديد ALEV4  بأبعاد  27.99 x 19.22 mm  D 33.96 mm وعلوم صورة مختلفة شوية عن علوم ARRI السابقة  فيها كمان  Color Science جديد اسمه REVEAL وتقدر تحصل من السينسور مع

عدسات تدعم Open Gate على صورة Native 4.5K

عدسات تدعم S35  على صورة Native 4K

عدسات انامورفيك 2X على صورة 3.3K  

مع نظام تشغيل Sensor Mode 6:5

   كمان أعلنت شركة ARRI انها قدمت مجموعة جديدة من المواصفات اللي بتقدمها في الكاميرا زي تطوير المدى الديناميكي DR 17stops واستخدام LogC4 و تطوير سعة التكويد الرقمي لمعلومات الصورة Bit Depth بقت 13bit لما تصور ARRI RAW  و 12bit لما تصور LogC4 ProRes وكانت في ALEXA LF Mini  سعة 12bit لما تصور ARRI RAW

  كما اعلنت عن نظام برامج لتعزيز التصوير الليلي (ES)  Enhanced Sensitivity ، ضافوا كمان أداة إبداعية في إدارة مظهر الصورة Look Management وهي Texture عن طريق تغيير شكل ومواصفات الصورة والاحساس بال Grains  بأشكال اختيارية متعددة كمان الكاميرا بتسجل بمعدل كادرات 0.75 - 120 fps بدقة تفاصيل 4K، وفيها 2 مخرج SDI  و أمكانية استخدام أماكن تثبيت العدسة Lens Mount مختلفة وان كانت الأساسية LPL ومواصفات كتير تاني تعالوا نتكلم عنها واحدة واحدة.

 

أولا  صور لواجهة الكاميرا الخارجية

"الصور من العدد الخاص لمجلة FD Times يونيو 2022

Image Sensor ALEV 4

   الشريحة الحساسة اللي استخدمتها ARRI في الكاميرا هنا هي شريحة حساسة فورمات S35 من نوعية CMOS وبتشتغل بفلاتر لونية Bayer زي سابقتها ALEV 3 لكن البنا وطريقة التعامل معاها اتغير عن الشرائح السابقة في كل كاميراتها ALEXA فمثلا زودوا عدد الفوتوسايت على الشريحة مع تصغير حجم الفوتوسايت كمان صنعوا السينسور رقمي (في المقال الثاني هاناقش تاثير النقط دي).

احد مديري شركة ARRI بيقول انهم بدأوا اول تطوير للسينسور الجديد في 2016 وفي 2018 ابتدا يبقى في اختبارات ل LogC4 و ALEXA Wide Gamma 4 (اللي هانشرحهم كلهم)

- ابعاد السينسور هي

 27.99mmx 19.22mm  بقطر  D 33.96 mm  

- ولأول مرة شركة ARRI تعمل سينسور رقمي

Digital Image Sensor

يعني السينسور بتخرج منه معلومات الصورة في هيئة بيانات رقمية وده شيء مختلف عن ALEV3 اللي كان بتخرج منه إشارة انالوج Analog signal بتتحول بعد كده لمعلومات رقمية في جهاز Analog to Digital Converter (ADC) في مرحلة لاحقة للسينسور .

-السينسور الجديد ALEV4 بيشتغل برضه بنفس طريقة ALEV 3 في موضوع الإشارة مزدوجة البناء Dual Gain Architecture علشان يقدر يعلى المدى الديناميكي Dynamic Range وده بيحصل من خلال انه بيخرج اشارتين واحدة حصل عليها تكبير(Gain) والثانية بدون تكبير علشان يحافظ على التفاصيل في المناطق عالية النصوع High Lights وبيتم مزجهم بعدها.

الجديد ان الإشارة المزدوجة المره دي في ALEV4  مش خارجة من السينسور كله مره واحدة لكل كادر لا دي متاخده من ال Pixel Site يعني من موقع تجميع معلومة ال Pixel من سطح الشريحة فكرة(Active pixel)وده معناه مدى ديناميكي عالي لكن برده ده معناه Noiseعالي ومعناه سخونه جامده ومعناه الاحتياج لبروسيسور اقوى

 

المدى الديناميكي Dynamic Range

من خلال البنا السابق ذكره مع LogC4 ومعالجات أخرى بتقدم الكاميرا مدى ديناميكي DR 17 Stops بزيادة 2.5 Stops عن سابقتها من كاميرات ALEXA . 

 

نظام (ES) Enhanced Sensitivity 

وضع الحساسية المحسن

ده النظام اللي اتاحته شركة ARRI اللي بيمكن المصور من التصوير بمؤشر تعريض عالي في الاماكن منخفضة الاضاءة و محاولة الحصول على تكبير للاشارة بدون شوشرة,Noise  وبيشتغل نظام تعزيز الحساسية  بداية من مؤشر تعريض Exposure Index   (EI 2560 to EI 6400)

وبيشتغل النظام ده من خلال تصوير Frame إضافي في الوقت اللي المفروض كان بيحصل فيه إطفاء لل Scanning ويبقى فيه كادر أساسي وكادر إضافي و من خلال الكادر التاني بيقيس البرنامج  ويحدد ال Noise ويعملها Denoiser، لكن نتيجة ال Scan الإضافي بينخفض معدل الكادرات اللي ممكن نحصل عليها في دقة تفاصيل 4K و معدل الكادرات Frame Rate  بينزل من 120FPS ل 60FPS.

نلاحظ برضه ان شركة  ARRI بتغير طريقة تفكيرها في زيادة الحساسية في السابق كانت بتفكر في زيادة الحساسية بزيادة حجم الفوتوسايت وتصميم وبنا الشريحة الحساسة نفسها وطبقاتها Image Sensor Structure يعني تصميم مادي ينتج عنه زيادة الحساسية للضوء.

لكن في ALEXA 35 بتقدم ARRI نظام لتحسين حساسية الكاميرا (ES) Enhanced Sensitivity Mode وطبعا ده نوع من أنواع معالجات الصورة Image Processing من خلال معالجة الإشارات الكهربية و البيانات الرقمية،  خايف أقول انها حاجة كده زي ال Night mode  في الموبايل احسن تطلع جامدة 😊 لكن بالفعل انا لا اعول كثيرا على أي معالجات بتتم على الاشارة مش تطوير مادي في السينسور،  لكن برضه  لازم نبقى عارفين ان شركة ARRI بتستعين بعلماء فعليا مهمين ومتميزين والاهم تقسيم وبنا الشركة لمجموعات عمل رائع بصراحة فاكيد في مجهود كبير في النتيجة اللي هانحصل عليها

وبتقول شركة ARRI ان النظام ده هايتيح الحصول على صور نظيفة Clear خالية من الشوشرة Noise بشكل أوضح، طبعا الشوشرةNoise  دي المشكلة الازلية للتصوير الالكتروني وهي نتيجة مباشرة لعمليات التكبير Gain اللي بتتم على الإشارات الضعيفة للغاية من مناطق Shadows والمناطق المنخفضة الإضاءة اكيد التجربة هاتكشف مدى نجاح نظام ES هل فعلا هايبقى نقلة نوعية في الحكاية ولا هايبقى محدود الاستخدام ؟؟ّ!

 

  REVEAL Color Science

ده الجزء اللي كتير مستنيين يفهموا ايه قصة ال Color Science الجديد 

أي Color Science بيستهدف دايما الوصول بمظهر الصورة الى مستوى فائق من الدقة والطبيعية والرضا على الوان البشرة والقدرة على ترجمة الوان اكبر ومحاولة عرضها بنفس طريقة الرؤية بالعين وده بيتم من خلال مراحل متتالية، شركة ARRI  شرحت مراحلها وهي

أولا : ADA-7

ADA-7 هي اختصار ARRI De-Bayer Algorithm 7  

وهي عبارة عن خوارزمية جديدة لعملية  ingDe-Bayerوظيفتها حسابات عمليات تجميع معلومات الجزيئات من مواقع التجميع على الشريحة الحساسة حسب الوان فلاتر باير  وتحويل معلومات ال RAW من السينسور الى RGB وطبعا دي هاتبقى موجودة في الكاميرا لو بتسجل ProRes او موجودة في برامج التلوين لو بتسجل RAW 

 شركة ARRI بتقول انها حلت مشاكل الخوارزمية السابقة ADA-5 ARRI De Bayer Algorithm5  اللي كانت بتتسبب في عيوب في حواف الصورة عند التصوير على شاشة خضرا او شاشة زرقا.

 ثانيا : محول الالوان ACE4

ACE4 اختصار ARRI Color Engine 4  

وهو  المحول اللوني اللي ها يتعامل مع معلومات الجزيئات RGB ويحدد قيم الالوان في تدرجات المدى اللوني الجديد AWG4 اختصار ARRI Wide Gamut 4

كتب واحد من مطوري الكاميرا " تبين أن معالجة الألوان هذه أكثر تعقيدًا مما كنا نظن في البداية ، لكننا سعداء حقًا بها الآن لدينا عرض أفضل للألوان عالية التشبع باستخدام محرك الألوان الجديد ARRI Color- Engine4 (ACE4) كمان قال ان المحرك الجديد ده بيعالج الألوان المشبعة الخارجة من لمبات الليد LED بشكل افضل بكتير من السابق

ثالثا : تدرجات مدى لوني واسع جديد AWG4

AWG4 اختصار ARRI Wide Gamut 4 Color Spaceتوسيع تدرجات المدى اللوني ليصبح AWG4 وهو اكبر من كل تدرجات المدى اللوني السابقة في مراحل انتاج الصورة من كاميرات ARRI 

 المدى اللوني الجديد ده اكبر من Rec 2020  وقريب جدا ل ACES P0 طبعا هنا الكلام عن نقل اكثر دقة للألوان Accurate Colors Reproduction وتحكم اكبر في لون البشرة Skin Tones  ....الخ

رابعا : C4Log 

LogC4 هي الصيغة اللوغاريتمية الجديدة اللي ابتكرتها شركة ARRI  للتعامل  مع الإشارات من  مناطق الضوء العالي High Lights ومناطق Mid Tones ومناطق الإضاءة المنخفضة Low Lights و LogC4 بديل LogC3، وفيه بتقدم  ARRI منحنى جديد للتعامل مع خطية الإشارات الخارجة من السينسور.

اللي فاهم فكرة عمل صيغ Log Gama ها يفهم الموضوع بسهولة لكن للي ماعندوش فكرة عنها هنا انت بتفتح المجال اكتر لمدى ديناميكي  DR اكبر وقدرة اكبر للكاميرا على تسجيل تفاصيل في مناطق النصوع المنخفض بشكل اكبر من لو اتعاملت مع  الشكل الخطي للاشارة  الخارجة من السينسور.

ملاحظة مهمة جدا  لو تفتكروا ان المدى الديناميكي DR كان بتتغير وقفاته بناءا على ضبط مؤشر التعريض EI فمثلا لو ظبطت على ISO 160 هايبقى وقفات ال DR  اكتر ناحية المناطق المظلمة Shadows  (مثلا 6 وقفات فوق و 8 تحت) لكن لو ظبطناها على ISO 1200 هاتبقى الوقفات اكتر في المناطق العالية High Lights (مثلا 9 وقفات فوق و 5 تحت) ده مع LogC3 ، لكن مع LogC4 يفضل توزيع الوقفات DR ثابت مع تغيير مؤشر التعريض EI.

 

خامسا : تحويل الصورة من صيغة LogC4 من خلال LUT

مجموعة كبيرة من جداول تحديد قيم الألوان LUTs صممتها ARRI لتحويل الصورة الى الشكل اللي ها يتناسب مع مواصفات المدى اللوني للعرض مثال: العرض على شاشات تلفزيون عادية فاهنتحول للمدى اللوني Rec 709

الموضوع ده ليه خلفية مهم نفهمها قبل ما نقول ايه الجديد  وها نشرحها للي حابب يفهم اكتر 

   في كل جهاز عرض  (شاشة TV – مونيتور – شاشة تليفون – بروجيكتور عرض) تدرجات لونية خاصة بيه تعبر عن مدى قدرة الجهاز في عرض الألوان  Color Gamut - Color Space

مصنعي كاميرات التصوير السينمائي الرقمي بتحاول تديك خيارات صورة تتوافق مع المدى اللوني Color Space للوسط اللي ها تعرض عليه Rec 709 -   2020Rec – P3 ..الخ الطريقة الأولى لو هاتسجل صورة جاهزة للعرض baked in Camera ها تحدد من منيو الكاميرا المدى اللوني للصورة  (حسب وسط العرض)،  و الطريقة  الثانية وهي الأكثر استخداما وهي  تسجل RAW او تسجل بصيغة LOG وتروح في  مراحل ما بعد التصوير  Post Production تعمل عملية التحويل من خلال LUTs وتتحدد حسب ها تعرض على ايه

 

عملية التحويل بتتم بجداول Look Up Table "LUT" وهي (جداول التحكم في عملية تحديد قيم الألوان في الصورة Color Remapping) ودي خطوات تقنية للانتقال بالألوان الى المدى اللوني للوسط اللي هانعرض عليه.

خلي بالك  الشركة بتأكد انك لازم تشتغل في Workflow بتاعهم وتستخدم LUTs بتاعتهم و بتنوه عن نقطتين 

الأولى : مش هاتقدر تستخدم LUTs السابقة لل Color Since ده حتى لو بتحبها ومتعود على استخدامها في التلوين لان  القديم هايشتغل على تحويل صورة جاية من LogC3 اما حاليا الصورة جاية من LogC4  اللي اتصمم على انه يحقق 2.5Stops زيادة في المدى الديناميكي DR فالشركة بتقولك بلاش وبتقولك نوصي بشدة انك تشتغل على LUTs اللي هاتلاقيها مصممة ل LogC4

التانية: ودي خطيرة جدا وعلى لسان مدير المشروع

في مراحل التلوين السابقة مع LogC3 كان ممكن ال Colorist يقول انا مش محتاج LUT انا هاروح 709  بشكل Manual و هابني الألوان مستندا على خبرته .. هنا بقه بيقولك Stop مش هاينفع الكلام ده مع LogC4 وبيقولك والنبي انت شاطر وكل حاجة بس لازم تستخدم LUT الخاصة بينا (ARRI) في بداية التلوين وبعد كده انطلق وعيش اياك حتى تعملها Rainbow (الرينبو دي هزار اكيد مني ما قالوهاش )

 

شركة ARRI بتقولك من فضلك ابدأ ب LUTs بتاعتنا وهما عاملين مجموعة كبيرة  حوالي 87  واحد على حد قولهم وها يوزعوها مجانا وكمان هي  جزء من ARRI Imaging Software Developer Kits (SDK) اللي  بيوزعوها على شركات كتير بتشتغل في مراحل المونتاج والتلوين وال CGI ...الخ  علشان يقدروا يدمجوها في برامجهم

دي كل مراحل ال Pipeline  الجديد ARRI Reveal 

  كده بقى عندنا LogC4/AWG4 وده معناه مدى ديناميكي كبير ومدى لوني واسع ودي تحديدا كانت توصيات التطوير في الصورة الرقمية اللي تم اعتمادها في يوليو 2016 من قبل الاتحاد الدولي للاتصالات (ITU) International Telecommunication Union

ملاحظات مع REVEAL Color Science

- ARRI أتاحت ال Color Pipeline ده للصورة ARRI RAW من كاميرا ALEXA LF  و ALEXA Mini LF  وكملن من خلال شراكة SDK بين ARRI والشركات المنتجة للبرامج الخاصة بالصورة في Post Production انها تديك اختيار تحول LogC3  او LogC4 ولما تحول LogC4  ها تقدر تستخدم Reveal Color Since بنفس مراحله  

- في المستقبل بيوعدوا انهم يحاولوا يخلو كل صور ARRI RAW من كاميرات ALEXA Mini  او SXT  او ْXT تستفيد من هذا التطور في علوم الألوان من خلال انك تختار في مرحلة التلوين LogC3 or LogC4

Your DaVinci Resolve or Baselight will have a switch where you can say process my ALEXA footage to LogC3 or LogC4

- خلي بالك بقه ان المعلومات المنشورة بتقول ان الصورة من ALEXA 35 اكثر تشبعا في الألوان من كاميرات ALEXA السابقة، فتعاملك مع الألوان بمنطق طبق السلطة الذي يحتوي على جميع الألوان المشبعة هايبقى متعب للاعصاب اكتر مما هو حادث حاليا في بعض حالات الاستخدام المفرط  للألوان الغير مبرر ولا دراميا ولا حتى جماليا -يمكن يمشي تجريبيا لو مقصود- زي ما بنشوف حاليا عيد ميلاد لمبات Tubesوطبعا ده راي شخصي اكيد ناس تتفق وناس تختلف ولهم جميعا كل الاحترام)

 

ملفات ALF-4

ALF-4 هو اوبشن تاني حطته ARRI  في الكاميرا وهو اختصار ARRI Look File 4 ملفات المظهر اللي في جزء كبير من المصورين بيستخدموها في الكاميرا علشان يضيفوا تأثير ابداعي على الصورة وبتتسجل في Meta data  كمعلومة لمرحلة التلوين والجديد انها بتشتغل بطريقة جديدة اسمها Log to Log .

لحد هنا ده الاوبشن المتاح لكن لو عاوز تعرف يعني ايهLog to Log  يبقى كمل قراية

ALF-2  كانت ملفات إدارة المظهر للصورة ARRI look files2 في كاميرات ALEXA السابقة اللي كانت بتوفر الامكانية دي وكانت الملفات دي بتحتوي على نوعين من الملفات

الأول هي LUT خاص بتحويل الصورة RGB الى المدى اللوني Color Space الخاص بالعرض مثال Rec 709 -   2020Rec  يعني خاص بتحديد قيم اللون حسب المدى اللوني لوسط العرض.

والملف التاني هو الملف الخاص  بإضافة تاثير ابداعي على الصورة  مثال Vintage – Vibrant – Cool – Warm ..الخ او حتى أي تاثير جهزته مع ال Colorist وحملته  على الكاميرا وده اللي بيبقى فيه  النظرة الإبداعية في تحديد قيم الألوان حسب رؤية صناع الصورة من مدير التصوير والمخرج فعلى سبيل المثال انهم محتاجين زيادة لقيم الأزرق في مناطق Shadows او ال Mid tone او High Lights في الصورة فبيشتغل ال Colorist  على إضفاء التاثير ده و اضافته في ALF-2. 

وفي موقع التصوير تقدر تحمل LUTs  على المونيتور وتتفرج على الصورة الخارجة من الكاميرا حسب المدى اللوني للمونيتور غالبا هاتلاقيه 709  ومضاف عليها التاثيرات الفنية اللي سبق اختيارها

او تقدر تحمل ال LUT على الكاميرا وتبقى  Look Files  يا اما تتسجل في metadata  بدون تأثير مباشر على الصورة المتسجلة زي اللي بنشوفها في كاميرات كتير وARRI عندها مكتبة فيها كتير من Look files يا اما بتتسجل كتاثيرات مباشرة على الصورة في كاميرات اقل في المستوى.

هناALF-2 بقى بيحتوي جدول تحديد قيم اللون حسب وسط العرض + التاثيرات في قيم اللون حسب الرؤية الإبداعية لمدير التصوير  

 ASC   اختصارAmerican Society of Cinematographers شافت ان لازم يبقى فيه طريقة موحدة للتعامل مع LUT فحددت طريقة ASC CDL  ودي الطريقة اللي ها توحد طريقة التعامل مع LUT في جميع مراحل الصورة الرقمية والطريقة دي بتعتمد على ترتيب وشكل كتابة البيانات اللي ها تتم على قيم الألوان في الصورة.

قصة ALF-4  اللي خدنا في طريق تاني خالص غير ALF-2

يقول احد مشرفي مشروع ALEXA 35 "بينما كنا نفكر في هذا الأمر، رأينا شيئًا مثيرًا للاهتمام في بعض دور ما بعد الإنتاج،  لقد بدأوا في استخدام 2 Separate LUTs يعني 2 من جداول التأثير في قيم الألوان كل واحد لواحده، الأول عبارة عن ملف Log-to-Log  يحتوي فقط على الهدف الإبداعي على سبيل المثال  اللون الأزرق الذي أراد ان يستخدمه مدير التصوير والمخرج بقيم محددة  في هذا الملف Log-to-Log والتاني  LUT خاص بجدول التحويل إلى مساحة ألوان العرض المطلوبة.

يبقى الهدف الإبداعي هانسجله في ملفات Log to Log  وما يختص بالمدى اللوني للعرض هايتسجل في ملف تاني والاتنين في فايل واحد Look File احنا هنا لسه في ALF-2  

ALF-4 الجديد هنا  مختلف تماما، لان ملف Look File الجديد ALF4 يحتوي على القصد الإبداعي فقط يعني  ملف Log-to-Log اما التحويل إلى أي مساحة لونية  Color Space للعرض دي ها تبقى خطوة ثانية بره ال Look File مش مسؤل عنها يعني لو في التصوير هاتختار المدى اللوني للعرض على المونيتور  كاختيار لوحده  في الكاميرا  فممكن يكون Rec.709 أو Rec.2020 او حتى Rec.2100 مع HDR ولو في مراحل ما بعد التصوير ها يحصل ال Colorist على ملف ALF4 Log-to-Log فقط من البيانات الوصفية Metadata وبعدها يضيف اليه Color Space اللي ها يشتغل عليه مشروعه كخطوة منفصلة

ليه بقه خرج ال LUT الخاص بتحديد فيم الألوان حسب الوسيط بره ملفات ال Look Files؟

بعد ظهور أنظمة العرض HDR في شاشات العرض زي  HDRو   HDR+و Dolby Vision  والمنصات بدأت تتيح نسخ  للمستخدمين اللي بيمتلكوا شاشات متقدمة بتقنية HDR دخل مدير التصوير وال Colorist في إشكالية شكلين مختلفين لنظامين عرض الصورة  (SDR) و (HDR) وبقى العمل بيطلع من خلال نسختين اذا اتطلب نسخة HDR  وبالتالي كان لازم يتعمل ملفين Look Files واحد  لـ SDR والتاني لـ HDR.

في  ALF4  خلى في فرصة ان الملفين يبقوا فيهم القصد الابداعى فقط Log to Log  واحد SDR والتاني HDR  يعني  ها تقدر تشوف في اللوكيشن في نفس الوقت شاشتين  SDR و HDR  في وقت واحد وده السبب في وجود 2 SDI في الكاميرا ALEXA 35 علشان توصل شاشتين واحدة SDR وواحدة HDR

"وفي رايي مش متأكد ده مفيد ولا مضر ؟! لان ده موضوع ممكن يلغبط مدير التصوير جدا انه يتابع شاشتين بنظامين غير بعض تماما SDR – HDR في نفس الوقت وطبعا ها يحتاج يتصمم في مراحل التحضير كويس جدا ويتدرس ويتجرب قبل التصوير لانه هاياثر على قرارات مرتبطة بالاضاءة في اللوكيشن"

   

TEXTURE

 

 

   بصراحة مش عارف الموضوع ده تحديدا ممكن يخدنا لفين يا يقلش جدا يا ينجح جدا وبالرغم ان وجوده في الكاميرا مديني إحساس بفلاتر Snapchat و شايف مكانه في Post Production او حتى  look files  لمجرد مشاهدة التأثير في اللوكيشن .. لكن ها أجل المشاغبة والجدل للمقالة التانية وهاشرح ايه الموضوع.

   وجهة نظر مطوري الكاميرا مبنية على انهم بيشوفوا مديري التصوير ممكن يستخدموا عدسات قديمة وفلاتر محددة علشان يحصلوا على تأثيرات مختلفة وفريدة في مظهر الصورة خاصة بيهم وتعبرعنهم بشكل فردي، ومن هذا المنطلق قدمت ARRI اوبشن Texture تغيير في نسيج الصورة ووصف التغيير بتغيير في حبيبات الصورة Grains (لاحظ الوصف والمصطلحات مستمدة من قاموس الفيلم film لمداعبة نستولوجيا مديري التصوير او يمكن لخلق موضة جديدة مع الشباب الصغيرين), وقدمت اختيارات Texture كأحد الأدوات الإبداعية المتوفرة  لمدير التصوير.

   مشكلة ال Texture معايا انه لا تراجع عنه لانه بيتسجل في الصورة وكل الكلام حواليه بحساسية  شديدة والشركة منزلة تنويهات واضحة جدا انك لازم تختبره قبل بداية التصوير وتشوف النتايج وتدرسها وحتى طلبوا ان اصغر مونيتور تشوف عليه الاختبار يكون على الأقل 32 بوصة.

فكرة ARRI  ان Textures  بيديك خيار إبداعي ممتع لم يكن متاح في الكاميرا من قبل و بيحط قدامك أفكار إضافية؟ يقول احد مطوري الكاميرا "أود أن أقترح تحديد الملمس المقصود للإنتاج في مرحلة الإعداد حيث يمكنك عرض مواد مختلفة على شاشة كبيرة وتحديد تلك التي يجب استخدامها كما أوصي باختيار Texture مع العدسات التي تخطط لاستخدامها في إنتاجك. وأخيرا أود أن أضيف أنه لا داعي للقلق بشأن Texture إذا كنت لا تريد أي شيء آخر غير الملمس الافتراضي للكاميرا فهو متوفر أيضا والتأثير خفي وفي الاصل يمكنك الحصول على تأثيرات أقوى بكثير باستخدام المرشحات الضوئية أو المؤثرات الرقمية في مرحلة ما بعد الإنتاج."

تتكون أسماء ARRI Texture من جزأين 

الجزء الأول حروف وارقام كاختصار تقني لمواصفات ال Texture  والجزء الثاني اسم اوكلمة توصفه، 

وفي الحقيقة فيه 30 مُعامل Parameters بيدخلوا في تحديد شكل ال Texture لكن المعروض اختصار من خلال  4 اختصارات مهمة في التاثير الفني في مظهر ال Texture 

الحرف الأول:  نوع Grains في الصورة بتقول شركة ARRI  "يمكن أن يختلف نوع التحبب بطرق معقدة للغاية، على سبيل المثال:  أكثر أو أقل من اللون ، ناعم / خشن إلخ. تم اختيار تصنيف مجرد للحرف الأقرب والأحرف موجودة في الأبجدية ، كلما كان الانطباع أكثر تشابهًا فيما يتعلق بنوع الحبوب (من الألف إلى الياء)"

الرقم الثاني: رقم يشير إلى كمية ال Grains كلما زاد الرقم ، زاد عدد Grains وبتكون موجودة  (0 الى 9).

الرقم الثالث: رقم يشير إلى مقدار التباين في الصورة الدقيقة (High Spatial Frequencies) كلما زاد الرقم ، زاد التباين (من 0 إلى 9)

الرقم الرابع: رقم يشير إلى مقدار التباين لبنىة الصورة الخشنة Coarse Image Structures  وبتشتغل        Low Spatial Frequenciesكلما زاد الرقم  زاد التباين (من 0 إلى 9)

K445 "Default"  

Go-to for most situations. Smooth skin tones, excellent clarity and detail.

P425 "Cosmetic" 

Softer texture, close to the default, more forgiving on skin tones. Low to moderate grain.

P325 "Soft" 

Cosmetic Softer texture than Cosmetic.

G733 "Nostalgic" 

More grain (higher first numer), vintage, softer, less saturation.

G522 "Soft Nostalgic" 

Softer texture than Nostalgic

F567 "Clarity" 

Greater sharpness and detail compared to the Default. Good for landscapes, trees, product shots.

F578 "High Clarity" 

Even more detail than Clarity.

L345 "Shadow" 

As the name says, works well for dark scenes, with grain reminiscent of the toe of color negative film. 

H457 "Deep Shado": 

For very dark scenes, less saturated grain with more shadow detail than Shadow Texture.

(يستكمل بأذن الله في المقالة رقم 2)